ياريت للشاعر الشاعر: حليم محمود أبو العيلة

 يا ريت

يا ريتنا اتولدنا بعد النهاردة

بكام ألف شهر ويبتدي عمرنا 

وتطرح أيامنا الجاية ورود

وأغاني ونايات تغزل فرحنا

وتبقىٰ الجيران غير الجيران

وميلادنا يتأجل سنين كلنا

الحقيقة مُرة مرار البُعاد

وياريت تبقوا شبهنا وزينا

نرسم نبض قلوبنا ع الجبال

وقلوب تقرب من دربنا

نعمل قلوبنا مراكب ورق

ويعوم  هوانا  ف  نهرنا

ونلضُم سبحتنا نجوم وقلوب

والفرح يُفرطها تِنور حينا

ونزوق دنيتنا بزينة جناين

ريحان وفل وسوسنا

وبيوتنا تبقىٰ ف المدارات

وفرحة قلوبنا تقيد شمعنا

وغرامنا صبر صبر أيوب

وصبر الإبل غار مننا

والخريف يصبح شتا وربيع

وحر قلوبنا يطفيه ودنا

ونصاحب سمانا والقمر 

وخطوتنا تسابق نور السنا

ونغزل قصايد بروح عشاق

وكل شيء يصبح قريب مننا

والممكن يبقىٰ كام ممكن

والأمل يحضن ويبوس حلمنا

يا ريت كان حد شارنا قبل

ما نتولد أو حتى خد رأينا؟

                    كلماتي:

الشاعر: حليم محمود أبو العيلة 

مصر