زكي على زينك للشاعر باسين نصرالدين
زكي على زينك..
هلكتني دلال بزينها عني تِجلب
ماصبت وين نفرفر منها ياتشطاني
نلاعب شعرها داهش مني يهرب
كي يثنثر على كتافها يدمر كياني
زادها فالزين طية مظفورة ترهب
ترعد عضايا حين نباصرها مڨواني
عينيها سود خلاتني بدمي مخضب
صنعة سيف قاطع وبتار يماني
نحس جوارحي تروح ليها تهرب
يعذرني العاشق لي حسها ثاني
لي عشق دلال قيمها راه يسحب
ورمشها يلطاف على العين رماني
مغروسة فلهداب وردة تعجب
وخدود معصورة تحمار بنعماني
صدر محطة ونهودها فيها الطب
ايدي حين تلامس نهدها تشهاني
تتلاعب اصباعي تختلها وتلعب
من كثرة الشوق سيلو الويداني
كفي راها تكفي لعنڨودها تطلب
لهفي لاهف لنهودها حلمي ساني
تراتيل عشقي فالقلب تطرب
تسابيح حبي تشعل جمرو ڨداني
الزين بهيبتو خايف زينها يكلب
مواجو تداكس تطحن فيه عياني
رغوات زبدها تعصرها من.القلب
ذبلت النهود من حياء همها باني
وانا عشقي ليها قيمو عني ضبب
سدات سحبات من حبها نعاني
شريك بزينك نسال فيه مكسب
حتي مٓغرم الزين صدقي ليا هاني
دلال من زينك صدقة فيها نطلب
حتى مال الزين راه فرحة لعياني
زكي على زينك يزهى بيه الحب
فرضها عليك عشقي محتم يعاني
الزكاة على زينك راهي توجب
يولي قلبي يدندن بعشقك نشواني
ياك زينك وافي النصاب نكتب
نصابو كاس من ريڨك يرويني
زينك يسوى مال قارون لي يحسب
يسوى حمل قوافلو فالسر ولعياني
هذ الزين لي عطاه ربي يوهب
فضلك على كثير من زين الرباني
دلال بكيتي دمعات عيني تصب
دمعتي الى بكات لك تفتت الفاني
تزيدي لهبالي هبال ولعقل يلولب
وحتى زينك ينطق الباكم يعاني
ننسج لك من سحابي جبة تعجب
ونجيبلك نجوم ديري ازرار قفلاني
ولقمر تاج لراسك مرصع بالشهب
خايفهم ينازعوني في زينك بهتاني
باسين نصرالدين
مرسلة بواسطة سهام ماجد @ فبراير 03, 2026
0 تعليقات
0 تعليقات:
إرسال تعليق
الاشتراك في تعليقات الرسالة [Atom]
<< الصفحة الرئيسية