حكاية أب للشاعر محمد الشربيني

 

حكاية اب ...

يوم ما شلتك

وخرجت من الباب

الدنيا كانت ماشية عادي

بس انا كنت بخلص

ما عيطتش

لا قوة

ولا صبر

ده كان شلل

الناس حوالي تقول البقاء لله

تحضنني

وتربت على كتفي

وانا واقف

كأني مستني حد يقول

استنوا… في غلط

ازاي تمشي

وتسيبني في النص

من غير ما تشرحلي

هعمل ايه لو وقعت

هسند ضهري على مين

كنت الاب

بس كنت كمان الامان

لما الدنيا تعور

والنور

لما السكة تظلم

والضهر

لما الركب تخون

بعدك

بقيت بخاف من صوتي

من سقوطي

من الليل

لما يطول وما يخلصش

البيت من غيرك

مش ناقص كرسي

ولا صورة

ولا صوت

البيت ناقص معنى

هدومك لسه متعلقة

وريحتك فيها

كل ما اقرب

اتخنق

مش من الحزن

من الفراغ

اكتر حاجة كسرتني

اني وانا شايلك

حسيت انك خفيف

خفيف اوي

وانا طول عمري

شايفك جبل

شايفك حاجة ما تقعش

بس الموت

ما سرقكش مني

ده سرق هيبتك

وسابني قدام الحقيقة عريان

من ساعتها

وانا كل ما اضحك

بحس اني بخونك

وكل ما افرح

بحس اني قليل

ازاي الحياة تكمل

وانت لا

الناس نسيت

الايام عدت

الشارع رجع صوته

والدنيا كملت شغلها

غيري انا

انا ما كملتش

كل ما حد يناديني بابا

قلبي يترج

وافتكر

ان اللي كان بيناديني يا ابني

مش هينادي تاني

يوم ما شلتك

ما كنتش بدفنك

كنت بدفن

اخر حد في الدنيا

كان شايفني ضعيف

ومع ذلك

بيحبني

ومن ساعتها

وانا ماشي

عامل نفسي راجل

بس الحقيقة

اني يتيم

واقف وسط الزحمة

بدور على صوت

يناديني

يا ابني

وما بلاقيش ،

      محمد الشربيني 

       24/2/2026