قدايا اتطل. للشاعرة نجوى النوّي

 " قدايا اتطل " 

قدايا اتطل اني شاهية والله 

قدايا اتطل ...قدايا اتطل 

يا روح روحي شمسها والظل 

اني شاهية ...والله قدايا اتطل 

تقعد معايا ساعة 

اني شاهية تقعد معايا ساعة 

تخفّف همومي وحشتي ملتاعة

والوقت متكدّس شديد فراعة

قدايا الخطاوي مسهّلة كي اتهل 

بيك اتّعلّى رقبتي م القاعة

يا شقيق أختك يا رفيق وخِل 

اني شاهية والله قدايا اتطل

يا ولد امّي 

يا طعم شهدة ذكرتك في فمّي

يلّي بوجودك تتجّلى شدايد همّي

لا دق بابي انقول هاهو وصل 

عزّي ودلالي والغلا متسمّي

يا عزيز روحي يا عبير الفُل 

اني شاهية والله قدايا اتطل

فطلتك انراجي 

في زول يجمع منيتي وعلاجي

بلا بيك تكثر ضيقتي وأهراجي 

بيدك هناتي متعتي والحل 

زينة حياتي فرحتي وديباجي 

بلا خُوت ما تحلى حياتي الكل 

اني شاهية والله قدايا اتطل 

بلا خوت ما تحلالي 

لا اندل شوري ولا الحياة تصفالي 

انتم عزوتي كتفي السمين ورجالي

انتم نور عيني منارتي والظل

أنتم راكم نجمتي وهلالي 

بوجودكم عشته شموخي الكل 

قدايا اتطل اني شاهية والله 

قدايا اتطل ...قدايا اتطل 

يا روح روحي شمسها والظل 

اني شاهية والله قدايا اتطل 

الشاعرةالعربية 

سمراء الجنوب 

نجوى النوّي 

تونس