كتب الشاعر توفيق بومدين لمنتدى المحيط قصيدة بعنوان الكلمة سطور

 الكلمة سطور 

فيها من المعاني بحور 

بحر هادي 

يفهمو العادي والبادي 

وبحر عامر هضور 

ما يفهمو غير سيدي مولاي

بلا ما يلف بلا ما يدور 

الكلمة نغمة فسوق الگجام

ما يتذوقها غير للي يفهم الكلام 

وتخرج من فمو عسل 

ويخليها شهدة عندها مقام 

دوى معطر بعطور

تداوي كل من قلبو عليل 

فدنيا عامرة بهتان وزور

الكلمة سر 

تفرّٓح وتـضـر

مول لعقل فيها مرتاح 

وقليل لعقل ديما مغرور

قلبت عل الكلمة فهاد الزحام 

لقيت كل واحد فيدو بوق

يسوّٓق كلامو على هواه 

زاندة عوافي ودخانها بخور 

مول المليح باع وراح 

وما بقى فسوق الكلام غير البرّٓاح

لسانو عافية وفيدو شاقور

        توفيق بومدين