باغي تهجر لمكان.... للشاعر محمد بلشقر

 🚎باغي نهجر لمكان🚎

باغي نهجر لمكان

كثرت علي لحزان

في كل جهة وفي كل مكان

البلاد ما بقى فيها أمان

الشفارة والگريساج في العلن

الإنسان في بلاده كيتهان

كيكذبو علينا بحقوق الإنسان

ولاو يحكمونا الرعيان

من أجل مصالحهم

تحالفوا مع عبدة الشيطان

نهبوا جميع الخيرات

بالحجة والبرهان

تبعوا خطة احديدان

خلاو لمخير في الشعب عريان

عذبوه وشربوه القطران

حياته كلها عذاب واحزان

بنادم ولا حيران

يفكر يهجر لمكان

يرجع الإبتسامة للصبيان

اللي فقدوها من زمان

ويضمن قوته ما يبقى جيعان

ويريح دماغه اللي ديما سرحان

يهجر لبلاد الشجعان

يتهنى من حكام الطغيان

قبل ما تشعل النيران

ويبان البرهان

*******

مكان ما بقى فيه لا سلم ولا أمان

غير الظلم والنسيان

الناس كتموت في الانجرافات والويدان

حوادث كثيرة في الطرقان

كون أخوي بحالي حرش اللسان

فضح الظلم في كل مكان

حكي على الأولاد في قوارب الموت

غرقوا في بحر الهجران

راه الذل والقهرة

تجعل الإنسان يعلن العصيان

ويتنكر لتراب لوطان

الإنسان من حقه يتخلى على كل شيء

ويهجر هارب من الجوع والحرمان

يخلص راسه من الذل وألهوان

الإنسان عيا من الكذوب والبهتان

وتقارير جطو وفلان وفرتلان

راه انت إنسان وانا إنسان

راه عيينا من الأحزان

دموعنا عمرت ويدان

الحاكم فقدنا منه الرحمة والحنان

اللهم الواحد يهجر لمكان

يمشي البلاد اللي يعيش

فيها الأمان والاطمئنان.

مجدوب الحرف : بلشقر محمد.