الشاعر خالد جمال و ... بتوجع اوي

 بتوجع اوي

لما ييجي الغدر وتكون الخيانة 

من اقرب ما ليك

لما تلقى صديق صباك من وراك 

بيتكلم عليك

لما فجأه غرام حياتك ذكرياتك 

بتضيع من ايديك

لما يدِّي الفتوى ويبقى قدوة 

إنسان مش سوي

           

بتوجع اوي 

لما يتقال على الطيب 

ابو قلب ابيض 

ده واد عبيط

لما يمشوا ورا المنافق 

واللي صادق 

يتقال عليه بلسان سليط

لما تلقى الانهيار والحمار 

يتحط من تحته الغبيط

لما تتقلب المعاني والاماني 

تبقى في ايدين فوضوي

      

بتوجع اوي

لما تلاقي ناس 

كانزه الدهب والماس 

والفقير مش لاقي الرغيف

اصحاب مليارات 

قصور  وعمارات 

وناس نومتها على الرصيف

لما تلقى البخت مال 

من ناس شمال 

مافهومش ولا واحد شريف

لما يبقى القوي 

صاحب النفوذ والثري 

والناس  بتيجي على الضعيف

ما يحس يوم بالهموم 

ولا بالعذاب 

الّا اللي بالنار مُكتَوي

      

بتوجع اوي

            

لما تلقى الرحمة 

في قلوب كل كائن حي الا البشر

لما تلقى الصادق عملة نادرة 

والكدب هو اللي انتشر

لازم نقول على كل دول 

مليون حرام 

لازم نقول لأّه وفَشَر

كفايانا نقص 

كفايانا ظلم 

بزيادة يا عم الفهلوي 

بتوجع اوي

بقلمي خالد جمال ٢٩/٤/٢٠٢٤