الشاعر هشام سليم و .. كل شيء جميل

 كل شئ جميل

يشوفه رمش كحيل

ف نهار أو ف ليل

إن كان طَلْع النخيل

أو موجة ترقص ف شط النيل

فرحة فراشة مفرفشة

نسمة هوا منعنشة

وردة تفتح قلبها قبل الأصيل

رسمة سحاب شوق الغياب

مشتاق يقاسي وحرقته نار العذاب

موجة بحر 

كسوف الشمس 

ف جو سِحر

الابتسامة لما تنور وش الوليد

بياض التلج ف قمة جبل

 وللا الجليد

قلب أم تحضن تضم

خوف مسئولية لأب ف قلبه عيد

رعشة إيد ف يوم جديد

لقلب خايف ف انتظار فجره السعيد

وللا العينين لما تقابل

تِبْر السنابل

وللا لقا بين الحبايب

تحت ظل حب دايب

بين الضلوع

مفيش ممنوع

حلو الرجوع

للي غايب

وللا الصحاب

اللي بينهم عشرة

من غير العتاب

كل شئ حتلاقيه

الشِّعر قادر يحتويه

الشعر نار نورها يغطّي

ضي النهار

الشعر حالة

بين العقل والجنون

واستحالة

بدون الشعر تكون مفتون

أبو الفنون

هوه انتا   كيف ما تكون

ف الحزن هوه دمعتك

ف الفرح هو بسمتك

ف الجرح آهة

وطريق متاهة

الشعر دنيا ف الخيال

هو الحقيقة والافتعال

ياليل ياعين ف الموال

الشعر شاعر مليان مشاعر

الشعر أنا فرح وهَنا

صرخة قلوب العاشقين

المحتارين المظلومين

من غير أنين

وباختصار

من غيرهزار

الشعر عسل

 نحلته واكلة المرار

الشعر عسل

 نحلته واكلة المرار

د .هشام سليم

شاعر الحرافيش