أبقى مين؟للشاعر عوني هشام

ابقي مين ؟

................ عوني هشام 

===============

من زمان بسأل فى نفسي

واقول لها انا ابقى مين

ضاع الجواب مني وتايه من سنين

لا عرفت ارد جواب لها

ولا حتى عارف كنت فين

عندى مرايه معلقه فى ركن بيت

من زمان ما زرتها

لقيتنى واقف جنبها

وفيها صوره شبهى تمام

قدمت خطوه للامام

لقيته شيبه وانا شباب

لكن ظني ما عمره خاب

معقوله انا هو انا

احساسي انه مش غريب

يمكن انا يمكن ابويا فى المنام

لكني صاحى وفى حوار بينا بكلام

النور طفيته عشان اشوف مين هنا

فضلت واقف فى الظلام

والكلمه طالعه مني انا

مين هنا طب مين هناك

ماحد رد وقال معاك

غير الصدى وفضل النِدى 

مش لاقي حد يردده

رجعت قيدت النور لقيته بهيئتي

مالك يا عم وليه وقفت فى سكتى

حاسس بأنى اعرفك بس انت مين

شكلك قريب قوى مننا

نفس الملامح كات هنا

لكن زهايمر صابنى ونسيت مين انا

والذاكره فى الماضي مع تعب السنين

واليوم بعيشه بس مش عارف لفين

مديت ايديا فى لحظه ولقيتهم ايدين

بينهم حواجز والعيون متسمرين

والكلمه وقفت ع اللسان متحجره

امشي خطوة للامام وخطوتين ارجع ورا

الصورة دى شبهى تمام يمكن انا

سرحت بخيالى معاه ونسيت انا

انا ابقي مين ؟

===========