ما تزعلش للشاعر احمد جلال بكري

 ما تزعلش…

خدت الشر ومشيت

يمكن كانت سحابة

وعدّت… وما مطرتش غير وجع

وسابت 

لو كانت ليك

كانت علّقت اسمك

في نجمة

ومغابتش.

اللي راح… مش دايمًا خسارة

يمكن كان حمل زيادة

يمكن كان باب مقفول

وانت واقف تستناه

وهو مش معمول عشانك.

واحدة مكان واحدة؟

لأ…

كل قلب وله حكايته

بس اللي جاي

ممكن يكون أهدى

أصدق

أحنّ

ويعرف يعني إيه يحتويك

من غير ما يكسرك.

الخير مش دايمًا بيبان

أول ما المصيبة تِدق

بس ربك شايف

ويا ما قلوب

على الشر ناحت

ولما الأيام لفّت

قالت: الحمد لله

إن اللي فات… فات.

اصبر… وخليك صبور

ده الفجر عمره

ما خان ميعاده

والليل مهما طول

بيزهق من سواده.

بص لقدّام

مدّ بصرك ع الآخر

هتلاقي فرصة

واقفة مستنياك

بس عايزة منك

خطوة شجاعة

مش خطوة خوف.

سلّم أمرك

بس متستسلمش

في فرق

بين اللي بيرمي نفسه

وبين اللي بيسيبها للي خلقها

وهو ماشي يحاول.

مفيهاش شاطر وشاطرة

دي دنيا بتلفّ بينا

مرة تضحكلك

ومرة تديك بالقفا

علشان تفوق.

مرة قلم على وشك

يفوقك من وهم

ومرة خبطة في الحيط

تعلمك تمشي عدل

ومرة تتعسر

علشان لما تتيسر

تعرف قيمة الرجوع.

وأهو كله

مش تخابيط…

دي دروس متغلفة

في شكل خساير

بس جوهها

نجاة.

يمكن اللي سابك

كان بيحررك

من نسخة أضعف منك

يمكن الوجع

كان بيطلع منك

حد أقوى

حد أهدى

حد ما بيترجاش حد.

خليك واقف

حتى لو رجلك بترتعش

خليك مؤمن

حتى لو الدعوة

لسه ما اتردتش.

الدنيا مش نهاية قصة

ولا حد فيها

آخر السكة

ولا قلب فيها

هو الرزق الوحيد.

رزقك جاي

في معاده

مش في ميعادك

واللي مكتوب لك

هيجيلك

ولو كان مستخبي

ورا ألف باب.

ما تزعلش…

سيبها تمشي

لو ليك

هترجع

ولو مش ليك

هتسيب مكانها

للي يستاهلك

ويعرف إنك

مش محطة…

إنت وطن.

أحمد جلال بكري